RACCONTO IN SARDO CAMPIDANESE

S’acua frida

Condividici sui Social...


Meda tempus fait, in s’istadi de su millenoixentusetantotu, m’agatà in mari a S’enna’e s’arca, in vacantzia cun d’unu grupu de amigus. Acanta’e nosu ci fiat unu casotu de linna chi fiat stau abandonau de meda tempus. Cun d’unu amigu e cumpangiu de traballu, castiendiddu, si fiat benida s’idea de ddu recuperai po ddu podi piatzai in d’unu logu chi si praxiat meda: S’acua Frida, in su Monti Arci. Po cussu si fiaus donaus de fai e fiaus arrennèscius a agatai su mèri, chi s’iat donau su permissu po ddu  smontai e ddu trasportai in domu nostra, chene bòlliri nisciunu cumpensu. Pagu tempus dopu iaus presentau sa domanda a su Comunu de Ales chi dd’iat atzetada. Cun d’unu pagu de traballu e de impènniu dd’iaus arrangiau e a sa fini dd’iaus trasportau in su monti e fiaus arrennèscius a ddu piatzai in d’unu puntu meda bellu de S’acua Frida. Fiat stada de avèras una bona idea, chi s’iat donau sa possibilidadi de bivi in cussu logu meravilliosu, chi est una vera opera de arti de sa natura, momentus bellus e “sensatzionis” praxilis, chi non s’ant a scarèsciri mai. A babbu miu Abramu, ddi praxiat meda sa montannia prus de su mari e fiat abarrau meda cuntentu de ai potziu passai una parti de s’istadi in cussu logu, chi insàras fiat apretzau e frecuentau de meda genti. Babbu, chi fiat unu veru scritori e poeta, iat scritu doxi  farsas e comedias in lingua sarda chi beniant, meda tempus fait, trasmìtias in “Radio Sardegna” su domìnigu, candu sa televisioni fiat ancora a is primas acuas. Sessant’annus fait iat fatu puru unu fotoromanzu: “Questo sangue sardo”, de su cali s’interprete printzipali fiat stada sa bravissima e famosa Maria Carta, chi iat biviu in domu nostra po tres mesis, candu deu tenia apènas set’annus; epuru dd’arregordu ancora cumenti’e chi siat oi. Iat scritu puru unu bellu libru de poesias: “Sprazzi di luce poetica”; e at lassau cosas fatas prus de cinquant’annus fait, chi parrint scritas oi poita, ligendiddas, dimostrant in modu craru ca su mundu, de insàras, non est cambiau e ca s’òmini est abarrau firmu in su tempus.

Custas dotis poeticas cosa sua, si fiant manifestadas in S’acua Frida puru e dd’iant spintu a dedicaai a cussa meravillia de sa natura, una pariga de poesias:

SOSTANDO SUL MONTE ARCI

Regale trono d’un piccolo regno,

A cui i fasti ha donato la natura,

Monte Arci tu sei, sublime altura,

Capolavoro del Divino ingegno;

Dalla modesta casetta di legno,

Lo scenario stupendo, la frescura,

Il tuo verde infinito, l’arte pura,

Godo estasiato, è un magico disegno!

Vedo alberi danzare, a cuor contento,

In uno spensierato e lieto oblio,

Al vociare metodico del vento;

Scende la sera e nel tramonto pio,

Quando la gioia si domina a stento,

Sento l’ambascia dell’animo mio!.

Abramo Garau, estate 1979

Monte Arci

Quatr’annus fait, in su duamillecatòrdixi, torrendi a pensai a cussu bellu periudu, mi fiat benida s’idea de fai una richiesta a su Comunu de Ales, po podi collocai in S’acua Frida una lastra de pedra cun asuba custa poesia scolpida. Apustis ai presentau sa domanda e ai insìstiu po meda tempus, su Sindigu, a sa fini, m’iat nau ca po teni su cunsensu tocada a inviai sa richiesta a sa Regioni puru. Funt passaus prus de cuatr’annus e non apu arriciu ancora nisciuna risposta. Custa est, ancora una borta, sa crara dimostratzioni de cantu sa “burocratzia” apat contribuiu in modu craru a fai arrui s’Italia in sa gravi situatzioni chi seus bivendi; e de cumenti puru su Comunu de Ales apat pigau in pagu cunsideratzioni custa richiesta e non dd’àpat donau s’importantzia chi meritada. In custa Terra nostra is artistas puru, medas bortas, benint trascuraus e postus a parti e a custu propòsitu est su casu de arregordai su diciu “Nemo propheta in Patria”. S’acua Frida po is bellesas naturalis cosa sua, chi fèssit stada valoritzada in su modu giustu, iat a depi èssiri unu de is logus prus visitaus de su turismu chi, cumenti sussedit in totu sa Sardinnia, benit tropu trascurau. S’Isola, po is donus chi sa natura dd’at fatu, depiat bivi, asuba’e totu, de su turismu, ma eus sempri dimostrau, in su tempus, ca non seus in gradu de sciri sfrutai a su mellus custa bona ocasioni chi iat a podi milliorai in modu determinanti s’economia Isolana; e medas bortas est propriu sa “burocratzia” chi impedit su svilupu in custu “setori” puru, chi est oi de fundamentali inportantzia po su benèssiri e su futuru de s’Isola nostra.



Condividici sui Social...

Notizie sull'autore

lagazzetta

Aggiungi Commento

Clicca qui per inserire un commento

il 1 e il 15 di ogni mese…