di Gigi Tatti
_________________
Salvatori tenit una serra aundi coltivat fràgolas, po dd’agiudai a dd’as assodì, at pigau unu Piciocu pagu espertu
Salvatori: Ecu, custu est su traballu chi depis fai. Andat beni? Candu as prenu sa cascita, ti ndi donu un atra.
Su Piciocu: Sissi: Ma ddi potzu fai una domanda?
Salvatori: Certu, naramì si ti serbit calincuna cosa?
Su Piciocu: Sissi. chi mi podi donai una scala po dd’as assòdì!
…………………………………………………………………………………………………………………………..
Battori est fadendusì is pilus in sa barberia de Diegu
Diegu: Nerimì, chi is pilus ddus bolit agoa?
Battori: Nossi. Si ddus podi puru teni fostei!
………………………………………………………………………………………………………………………………..
Marieddu e Galdinu funt a scola e su maistu est interroghendiddus
Su maistu: Galdinu. Mi depis nai cali est su personàgiu chi prus t’at colpiu
Galdinu: A mei, su personàgiu chi de prus m’at colpiu est istètiu Giulio Cesare
Su maistu: Bravu Galdinu. E a tui Marieddu?
Marieddu: A mei, su chi m’at colpiu de prus est babbu miu
Su maistu: Comenti babbu tuu?
Marieddu: Sissi, est babbu miu, candu dd’apu fatu biri sa pagella de s’annu passau!
………………………………………………………………………………………………………………………………..
Zemilianu est in su bar gioghendi a cartas cun Balloi
Balloi: No parrit berus cantu ses cullau gioghendi a cartas. Inveci, candu scumitis cun sa cursa de is cuaddus no bincis mai. Ma comenti est su fatu?
Zemilianu: Su fatu est, ca is cuaddus no ddus murigu deu, is cartas inveci si!
………………………………………………………………………………………………………………………………………………………..
Turiddu andat in America a agatai una tzia
Turiddu: Tziedda, comenti mai ses bistia de nieddu? Ses in lutu?
Sa tzia: Si, disgratziadamenti seu in lutu, ca ses mortu pobiddu miu, tziu tuu.
Turiddu: Mi dispraxit meda cara tziedda. No ddu sciria. E comenti est mortu?
Sa tzia: Est mortu fulminau de sa currenti.
Turiddu: Infortùniu in su traballu?
Sa tzia: No, in sa “sedia elettrica”!
……………………………………………………………………………………………………………………………
Amalia nd’est bessia de su Parruchieri e incontrat sa gomai Pinuccia
Pinuccia: Stais tropu beni. Ti biu ringiovania de una pariga de annus.
Amalia: At essi, ma su contu chi m’at fatu pagai su parruchieri, ge m’at fatu imbeciai de trint’annus!
…………………………………………………………………………………………………………………………………….
Su Tram de Casteddu est prenu a cùcuru de genti, Gigetu ca est làngiu che un aciuga, est discutendi cun dd’unu Cicioni
Gigettu: Ma insoma, fostei dda bolit smiti de spingi?
Su Cicioni: Ma cali spingi. Deu no seu spingendi, seu scèti arrespirendi!
…………………………………………………………………………………………………………………………………….
Crispinu e Rosa funt a Roma in albergu
Su impiegau: Dittemi, volete una Suite?
Crispinu: No grazie, su suitu ddu teneus in domu!
S’impiegau: Volete il bagno in Comune?
Rosa: Non li fa niente.
Crispinu: O Rosa, perou naraddi ca bastit chi su Comunu no siat atesu meda, po andai a in bànniu!
…………………………………………………………………………………………………………………………………………….
Franciscu est passsendi in màchina e biri a s’amigu Siru
Franciscu: Ciau Siru, benis cun mei a zonzo?
Siru: No, no potzu, tengu cos’e fai. Oghinò m’iat a praxi puru, ca a sa bidda de Zonzo, no ddoi seu mai andau!
………………………………………………………………………………………………………………………….
Unu cow-boy sardu, torrat a domu a scurigau mortu e agat a sa pobidda abetendiddu
Sa pobidda: Fia scrètia meda, ita cosa a cust’ora e aici tristu?
Su cow boy: Una banda de delinquentis m’ant firmau e mi nd’ant furau totu
Sa pobidda: Ita totu?
Su cow boy: Su dinai, s’orològiu e su cuaddu
Sa pobidda: Ma no portasta sa pistola?
Su cow boy: Eja, ma ci seu arrenèsciu a dda cuai!
…………………………………………………………………………………………………………………………..
Torquatu est in sa statzioni abetendi su trenu po andai a Casteddu, candu biri una pesa
Torquatu: La, una pesa. Imoi bollu biri si seu aumentau de pesu. La, c’est scritu “Pesa parlante” depit essi una tontidadi, po ti ndi furai su dinai. Imoi bollu provai.
Pesa parlante: Tu ti chiami Torquato, sei sardo, sei alto, anzi basso 1,50, pesi 89 chilogrammi e il tuo treno parte tra 7 minuti esatti.
Torquatu: Ma càstia, no parrit berus, m’at inzertau totu! Imoi perou mi coberru sa faci, ca bollu biri si mi torrat a conosci!
Pesa parlante: O Torquatu, no fatzas su furbu? Sei sempre il sardo Torquato, sei sempre alto, anzi basso 150, pesi sempre 89 chili, e po culpa de custa tontidadi, as pèrdiu su trenu, poita, est gia partiu unu minutu fait!
……………………………………………………………………………………………………………………………………………
Ginetu at papau in Ristoranti candu dd’est arribau su contu, arrennegau tzèrriat su Camerieri
Su Camerieri: Totu beni?
Ginettu: Ma cali beni, totu mali!
Su Camerieri. Ita est andau mali?
Ginettu: Su contu. Biu in sa fatura ca c’eis aciuntu puru sa data de oi
Su Camerieri: Certu: Fostei, no ddu scit, ca su tempus est dinai?
………………………………………………………………………………………………………………………………….
Mundinu est setziu in sa poltrona de su Dentista po si curai unu denti
Su Dentista: Bho, non apu fatu ancora nudda, no dd’apu fatu ancora, mancu aberri sa buca e fostei est tzerriendi comenti chi fèssa pungendiddu
Mundinu: No seu tzerriendi poi is dentis, est ca fostei est giai cincu minutus, chi est pistendumì unu callu!
………………………………………………………………………………………………………………
Achille est a manu pigada cun Grazia passillendi in sa spiàgia
Achille: Est aici, amorixeddu miu, crasi si coiaus.
Grazia: E si amori mannu miu. Deu cun Tori e tui cun Priscilla!
……………………………………………………………………………………………………………………………..
Sofia est arrenneghendi cun su pobiddu Eliseu
Sofia: Ti lassau tropu andai cun su papai. No soportu cussa panceta de milionàriu chi portas.
Eliseu: Poita ti donat fastìdiu?
Sofia: Certu, portas panceta de milionàriu e inveci ses spiantau!
……………………………………………………………………………………………………………
Sa Maista at nau a is scolarus, de scrii in su quadernu po centu bortas, su nòmini e su sangunau insoru
Sa Maista: Aici imparais a non imparai sa poesia chi s’apu donau de studiai a domu. E tui ita bolis a manu artziada?
Unu Scolaru: Perou non est giustu aici! Deu mi tzèrriu Picherreddus Gianguglieminu e inveci su cumpàngiu de bancu miu, si tzèrriat Pia Ivo!
……………………………………………………………………………………………………………………………………….
Triagus est unu cassadori inespertu e andat a cassa cun su gopai Pedru, cassadori meda bravu
Pedru: M’arracumandu, dona atentzioni, ca innoi c’est unu bellu passàgiu de becàcias.
Triagus: Insaras naramiddu tui, candu depu sparai.
Pedru: Ecu, dai, ci seus, spara imoi.
Triagus: Bellu! Apu sparau beni? Dd’ap’ai becada sa becàcia?
Pedru: Bravu, bai a biri it’as cassau.
Dopo qualche minuto
Pedru: E insaras it’as mortu?
Triagus: Bho! De is documentus, mi parrit unu Ragionieri!
RIPRODUZIONE RISERVATA
Aggiungi Commento