Scracalius, barzellette in sardo

di Gigi Tatti

______________

In dd’unu circu sardu de tertza categòria su Diretori tzèrriat a Alfredu, s’operàiu de is pulitzias

Su Diretori: O Alfredu, sigumenti est proendi, smitidda de sciaquai is origas de s’Elefanti e intrandi luegus sa Zebra aintru de sa tenda.

Alfredu: Poita luegus? Ge c’est tempus.

Su Diretori: Toca o Alfredu, circa de ti movi, ca si sighit a proi, sa Zebra si svernìciat!

………………………………………………………………………………………………………………………………………….

Su Nonnu andat a agatai su Nebodi chi si depit coiai

Su nonnu: Seu beniu a ti fai is augùrius, e po ti nai puru, ca custa po tui est sa dì prus bella, chi seguru t’as arregordai po cantu bivis.

Su Nebodi: Gràtzias de is augùrius nonnu, ma ti bollu arregordai ca est crasi, e non oi, chi mi depu coiai.

Su nonnu: Est pròpiu po cussu, chi ti depis arregordai de oi!

………………………………………………………………………………………………………………………………………..

Grazietta est telefonendi a su piciocu

Grazietta: Eja, t’apu nau ca ge andu custu merì a domu tua, po biri sa colletzioni de is francubullus. Ma t’avisu, ca mi donat fastìdiu si ti ponis a fumai in su letu!

…………………………………………………………………………………………………………………………………………….

Gelinda andat a si fai visitai de unu psicòlogu

Su psicòlogu: Ita problemas tenit?

Gelinda: Pensu de teni unu complessu de inferioridadi.

Su psicòlogu: De ita si nd’est acatada.

Gelinda: Mi ndi seu acatada, poita candu biu fèminas de s’edadi mia, dd’as biu totus prus bellas de mei e po cussu creu de essi lègia.

Su psicòlogu: Dd’asseguru, ca fostei est sana che unu pisci, e no tenit nisciunu cumplessu!

…………………………………………………………………………………………………………………………..

Lillicu est discutendi cun Efis

Efis: Ci scumitu sa conca, ca cust’annu su Custeddu arribat ne is primus cincu in classìfica.

Lillicu: E deu ci scumitu su portafòliu, ca si salvat scèti in s’ùltima giornada de campionau.

Efis: Perou non est giustu, chi tui scumitas su portafòliu.

Lillicu: Nara, poita non est giustu?

Efis: Poita su portafòliu tuu est sempri sbuidu.

Lillicu: Ma poita, sa conca tua est prena?

Emiliu est coment’e sempri in giru, fueddendi cun Benignu.

Benignu: Nara, po curiosidadi, tui, comenti dda tzèrrias a sroga tua?

Emiliu: Deu no dda tzèrriu mai.

Benignu: Poita no dda tzerriasta mai?

Emiliu: Poita si dda tzèrriu, est capassa de arribai luegus a domu!

………………………………………………………………………………………………………………………..

Albinu est torrau de Milanu in vacanza e incontrat s’amigu coràbili Geseu

Geseu: E insaras ita mi contas de sa Metròpoli.

Albinu: Totu beni a parti su clima.

Geseu: Sciu ca sa nèbia est cosa mala.

Albinu: A ddi nai mala est pagu. Pensa ca custu ierru, no si biriàt aici nudda, ca inveci de mi ndi sonai su mucu, nde dd’apu sonau a unu chi fiat passendi!